Ҳамкории тиҷоратию иқтисодии Тоҷикистон ва Озарбойҷон

Душанбе, 5 март. (АМИТ «Ховар», Кристина Эрлих). – Имрӯз, 5 март, дар шаҳри Душанбе ҷаласаи якуми Комиссияи байниҳукуматии Тоҷикистону Озарбойҷон аз рӯи масъалаҳои ҳамкории тиҷоратию иқтисодӣ баргузор гардид.Сарварии ҳайати Тоҷикистонро вазири рушди иқтисод ва савдои ҶТ, ҳамраиси комиссия аз ҷониби Тоҷикистон Шариф Раҳимзода ба ӯҳда дошт. Вазири рушди иқтисоди Ҷумҳурии Озарбойҷон, ҳамраиси комиссия аз ҷониби Озарбойҷон Шоҳин Мустафоев роҳбари ҳайати Озарбойҷон буд.Ҷонибҳо дар ҷараёни ҷаласа ба якдигар аз вазъи иҷтимоию иқтисодӣ ва сиёсати иқтисодӣ дар бахшҳои мухталифи ҳар ду кишвар хабар дода, перомуни вазъи ҳозираи муносибатҳои тиҷоратию иқтисодии байни ҳар ду мамлакат табодули афкор намуда, ҳамчунин нерӯи бузургро ҷиҳати рушди минбаъдаи ҳамкории дуҷонибаи иқтисодӣ қайд намуданд. Ҷонибҳо изҳор доштанд, ки рушду густариши муносибатҳои тиҷоратию иқтисодии байни Озарбойҷону Тоҷикистон мароми умумии ҳукуматҳои ҳар ду кишвар аст. Онҳо ҳамчунин дурнамои рушди минбаъдаи ҳамкории иқтисодӣ бахшҳои мухталифро мавриди муҳокима қарор доданд.Баъди анҷоми ҷаласаи Комиссияи байниҳукуматии Тоҷикистону Озарбойҷон протоколи муштарак имзо шуд.