А. Сатторов аҳли қаламро бо иди касбиашон табрик намуд

Душанбе, 5 март. (АМИТ «Ховар», Лутфия Эшонқулова).-11 марти соли равон матбуоти тоҷик 100- сола мешавад. Ба муносибати анҷоми фаъолияти садсола ва фарорасии марҳилаи нави таърихӣ, раиси Иттифоқи журналистони Тоҷикистон Акбаралӣ Сатторов ҳамаи рӯзноманигоронро табрик намуда, аз ҷумла изҳор дошт :«Таҳаввулоти матбуоти миллӣ дар 20 соли охир назаррас аст. Пас аз шикасти қолаби матбуоти яккаидеологии давлатӣ дар Тоҷикистон матбуоти мустақил пайдо шуд. Аҳли қалам бар ивази талафоти ҷонӣ ва маънавӣ дар солҳои инқилоби истиқлолият, бархӯрдҳои шаҳрвандӣ, ҷиҳати эъмори ҷомеаи дунявию демократӣ, бедориву худшиносии миллӣ, ташаккули озодии сухан қадамҳои устувор гузоштанд.Имрӯз дастовардҳои садсола бо заҳмату ҷасорати собиқадорони матбуот, зиёиёни номӣ ва насли ҷасури рӯзноманигорони даврони Истиқлолият торафт пойдор мегарданд. Ҷашни садсолагии матбуот ҷомеаи журналистии моро рӯҳу илҳоми тоза бахшида, сӯи фатҳи марраҳои нави касбӣ роҳнамоӣ мекунад. Умеди комил дорам, ки бо талоши дастҷамъона ин рӯзи тақвимиро мазмуну мӯҳтавои нав мебахшем».