Афзоиши истеҳсоли хишт дар Суғд

Душанбе, 12 март. (АМИТ «Ховар», Дилшодаи Хайруллоҳ).-Бо мақсади татбиқи «Барномаи рушди масолеҳи сохтмонӣ дар давраи то соли 2015» бунёди корхонаҳои нав, таъсиси ҷойҳои нави корӣ, ба роҳ мондани намудҳои нави масолеҳ ва таҷдиди корхонаҳои амалкунанда идома дорад. Бо дастгирии Вазорати энергетика ва саноати Ҷумҳурии Тоҷикистон дар ноҳияи Ҷаббор Расулови вилояти Суғд боз як корхонаи нав- ҶДММ «Қувватулло» дар оғози соли ҷорӣ бо иқтидори 2 млн. дона хишт дар як сол ба истифода дода шуд. Маблағи умумии барои сохтмони корхонаи мазкур харҷгардида 300 ҳазор сомониро ташкил менамояд. Барои истеҳсоли хишт гилхоки кони «Хитой» истифода мешавад. Бояд тазаккур дод, ки моҳи январи соли ҷорӣ корхона ба фаъолият шурўъ карда, то ин дам ба миқдори 160 ҳазор дона хишт истеҳсол намудааст.