Барномаи тарбияи ҳарбию ватанпарастии наврасону ҷавонон тасдиқ шуд

Душанбе, 2 март. (АМИТ «Ховар», Дилшодаи Хайруллоҳ).- Дар маҷлиси Ҳукумати Ҷумҳурии Тоҷикистон, ки рӯзи 28 – феврали соли равон зери сарварии Президенти Ҷумҳурии Тоҷикистон Эмомалӣ Раҳмон доир шуд, барномаи «Тарбияи ҳарбию ватанпарастӣ ва варзиши ҳарбию амалии наврасону ҷавонони синни тодаъватӣ ва даъватии Ҷумҳурии Тоҷикистон барои солҳои 2012 – 2015» тасдиқ гардид. Дар таърихи кишвари соҳибистиқлоли мо ин гуна барнома бори нахуст таҳия ва тасдиқ шуд, ки ба навъи худ рухдоди пураҳамият ва муҳим ба шумор меравад. Барномаи мазкурро Кумитаи Марказии Ташкилоти ҷамъиятии мададгори мудофиаи ҷумҳурӣ таҳия намуда, бо мақомоти дахлдори давлатӣ мувофиқа сохта, барои баррасӣ ба Ҳукумати кишвар пешниҳод намуда буд.Ҳадафи барнома ба низоми муайян ва пурсамар ворид намудани маҷмӯи чорабиниҳои марбут ба тарбияи ҳарбию ватандӯстии наврасону ҷавонони синни тодаъватӣ ва даъватӣ, такон бахшидан ба рушду нумуи намудҳои ҳарбию амалии варзиш мебошад. Сохтмону навсозии иншооти варзишӣ, дастрас ва харидани воситаҳои техникии варзишӣ, инчунин баргузории мусобиқоти сатҳи ҷумҳуриявии гуногун аз рӯи намудҳои ҳарбию амалии варзиш, барпо намудани чорабиниҳои зиёди тарғиботӣ, эълону баргузор кардани озмунҳои таблиғи ормонҳои ватанхоҳӣ миёни рӯзноманигорону нависандагон ва аҳли ҳунар аз ҷумлаи чорабиниҳои асосие мебошанд, ки давоми солҳои 2012 – 2015 амалӣ хоҳанд гардид.Бо итминон метавон гуфт, ки татбиқи муқаррароти барнома қадами ҷиддӣ ва устуворе хоҳад буд, ки раванди корҳои тарбияи ҳарбию ватандӯстиро ба зинаи сифатан тозаи пешрафт бароварда, уфуқи наверо дар ин самт боз хоҳад намуд.