Бемориҳои хатарнок, аммо табобатшаванда

Душанбе, 5 март. (АМИТ «Ховар», Лаззат Диловарзод).- Бино ба гуфти момодояи Маркази солимии репродуктивии ноҳияи Вахш Зарима Очилова, гирифтории бонувони қобили таваллуд ба бемориҳо (вируси) -и гузарандаи, ба қавле бачакуш, «хломидиоз», «ситомоголовирус» дар ин минтақаи кишвар боиси нигаронист.Ба гуфти З. Очилова, ин бемориҳои гузаранда аз тариқи алоқаи ҷинсӣ бештар дар бадани заноне пайдо мешаванд, ки ҳамсаронашон аз муҳоҷирати корӣ бо худ меоранд. Аз 64 зане, ки тифли батни худро аз даст додаст 50 фоизи онҳо бо вируси «хломидиоз» ва «ситомоголовирус» сироят шудаанд.Мутаассифона, дар ноҳияи Вахш барои кашфу таҳқики ин бемориҳо санҷишгоҳ вуҷуд надорад. Гирифторони чунин бемориҳо ба Маркази солимии репродуктивии шаҳри Қӯрғонтеппа аз ҳисоби сокинони ноҳияҳои Вахш, Бохтар ва шаҳрҳои Сарбанду Қӯрғонтеппа хеле зиёд муроҷиат мекунанд. Бо вуҷуди он ки ин тарзи бемориҳо барои занон хатарноканд, аммо табобатшавандаанд,- мегӯяд З. Очилова.