Боғи миллӣ дар Фархор

Фархор, 13 март. (АМИТ «Ховар», Сулаймон Холов). – «Барномаи давлатии рушди соҳаи боғутокпарварӣ то соли 2014» дар кулли ноҳияҳои кишвар зина ба зина амалӣ мегардад ва дар заминаи татбиқи босуботи он бахшида ба 20-солагии иҷлосияи 16-уми Шӯрои олии Ҷумҳурии Тоҷикистон сокинони ноҳияи Фархори вилояти Хатлон дар ҳудуди 30 гектар Боғи миллӣ бунёд намуданд. Бо дастгирии мақомоти иҷроияи давлатии ноҳияи Фархор тамоми кормандони ташкилоту идора, муассисаҳои таълимӣ ва 10 ҷамоати деҳоти ноҳия дар заминҳои барои онҳо ҷудошуда зиёда аз 20 намуди ниҳолҳои гуногуни мевадиҳанда шинониданд. Бояд ёдовар шуд, ки сокинони ноҳияи мазкур ба истиқболи ҷашни Наврӯзи байналмиллалӣ зиёда аз 18 ҳазор ниҳоли гуногуни мевадиҳандаро, ки аз вилояти Суғд дастрас гардида буданд, дар Боғи миллӣ ва дигар боғу майдонҳои ба боғдорӣ мувофиқ шинониданд.