Бунёди 2 НБО-и хурд дар соли 2012

Душанбе, 3 март. (АМИТ «Ховар», Дилшодаи Хайруллоҳ).- Тибқи қарори Ҳукумати Ҷумҳурии Тоҷикистон №73 аз 2 феврали соли 2009 «Дар бораи Барномаи дарозмуддати бунёди силсилаи нерӯгоҳҳои хурди барқӣ дар давраи солҳои 2009-2020» Вазорати энергетика ва саноати Ҷумҳурии Тоҷикистон дар якҷоягӣ бо вазорату идораҳои дахлдор ва сармоягузорони ватанӣ ва хориҷӣ доир ба сохтмони НБО-и хурд корҳои муайянро ба сомон расонид.   Аз аввали соли ҷорӣ дар ҷумҳурӣ 2 адад нерӯгоҳи хурд бо иқтидори аз 7,5 то 30 кВт ба истифода дода шуд, ки иқтидори умумиашон 37,5 кВт-ро ташкил намуда, нерӯгоҳҳои мазкур 54 хоҷагиҳо ва 1 адад корхонаи сохтмониро бо нерӯи барқ таъмин менамояд. Имрӯзҳо дар ҷумҳурӣ бо ҷалби сармоягузориҳои Ҳукумати Ҷумҳурии Тоҷикистон, Бонки исломии Рушд, Ҳукумати Олмон, Ҷопон, ШСХК «Барқи Тоҷик» ва сармоягузорони ватанӣ сохтмони 7 адад НБО-и хурд бо иқтидори умумии 2044 кВт идома дорад.Аз ҷумла, дар вилояти Хатлон 1 нерӯгоҳи хурд бо иқтидори 100 кВт, дар вилояти Суғд 1 адад бо иқтидори 475 кВт, дар вилояти ВМКБ 2 адад бо иқтидори 135 кВт ва дар ноҳияҳои тобеъи ҷумҳурӣ 3 адад бо иқтидори 1334 кВт ба истифода дода мешавад. То имрӯз дар ҷумҳурӣ аз солҳои 1991-2012 ҳамагӣ 267 адад НБО-и хурд бо иқтидори аз 5 то 4300 кВт сохта ба истифода дода шудааст, ки иқтидори умумиашон 23325,1 кВт-ро дар бар мегирад.