Деҳқон бошӣ- шудгор кун

Душанбе, 7 март. (АМИТ «Ховар», Лаззат Диловарзод),- Бино ба маълумоти Раёсати растанипарварии Вазорати кишоварзӣ, пешбинӣ шудааст, ки майдони 618 ҳазору 15 гектар замин то оғози кишти баҳорӣ шудгор карда шавад. Чунонки аз маълумоти раёсати вазорат бармеояд, то 5 –уми март ҳамагӣ 448 ҳазору 548 гектар замин шудгор шудааст, ки он 72,6 фоизи нақшаи пешбинишударо ташкил медиҳад.Ҳамзамон тибқи дурнамои вазорат соли ҷорӣ дар масоҳати 130 ҳазору 98 гектар кишти зироати баҳорӣ пешбинӣ шудааст. Ба иттилои манбаъ, то 5 –уми марти соли ҷорӣ ҳамагӣ дар масоҳати 16 ҳазор гектар кишти баҳорӣ анҷом дода шудааст, ки 12 ҳазор гектари онро гандум, 2 ҳазору 560 гектарро ҷав ва 1 ҳазору 391 гектари дигарашро кишти дигар навъҳои ғалла ташкил медиҳад.Дар ин давра дар ҳоҷагиҳои кишоварзии вилояти Хатлон 13 ҳазору 695 гектар, дар вилояти Суғд – 1152 ва дар ноҳияҳои тобеи ҷумҳурӣ ба андозаи 1 ҳазору 459 гектар кишти баҳорӣ гузаронида шудааст.Дар сурате, ки шудгори замин то кишти баҳорӣ анҷом дода нашудаасту кишти баҳорӣ ҳамагӣ 12 фоиз иҷро шудааст, деҳқононро дар шароити обу ҳавои имсола имтиҳони ҷиддӣ дар пеш аст ва беҳуда нест, ки миёни мардум зарбулмасали «Деҳқон бошӣ, шудгор кун…» маҳбубият дорад.