Эъломияи Душанбе қадами устувор дар роҳи эҳёи Афғонистон

Душанбе, 27 март.(АМИТ «Ховар», Марзия Саидова).- «Мо итминон дорем, ки Эъломияи Душанбе ба ҳайси қадами навбатӣ дар пешбурди раванди ҳамкориҳои минтақавӣ ва барқарорсозии сулҳу субот, эҳёи иқтисодию иҷтимоии Афғонистон ва рушди минтақа саҳми худро гузошта метавонад»,- зикр намуд зимни нишасти матбуотӣ ба хабарнигорон Ҳамрохон Зарифӣ, вазири корҳои хориҷии Ҷумҳурии Тоҷикистон. Мавсуф афзуд, ки конфронси панҷуми ҳамкориҳои минтақавии иқтисодӣ доир ба Афғонистон / RECCA-V/, ки муддати ду рӯз -26-27 марти соли 2012 дар пойтахти Ҷумҳурии Тоҷикистон- шаҳри Душанбе зери шиори «Ҳамкориҳо барои таҳкими ҳамгароӣ ва рушду суботи минтақавӣ» доир гардид, бояд ҳамчун заминаи устувор барои ҳамкории дарозмуддат ва шарикӣ, рушди робитаҳои мутақобилан судманди тиҷоратию иқтисодии кишварҳои ҳавасманд хизмат намояд.  Ҳамрохон Зарифӣ таъкид кард, ки дар марҳилаи барои Афғонистон сарнавиштсоз Эъломияи Душанбе аз ҷониби ҳамёрони ин кишвар – давлатҳо ва созмонҳои байналмилалию минтақавии манфиатдор дастгирии ҳамаҷониба ёфта, ҷиҳати анҷоми муваффақонаи мақсадҳои муайяншуда ба ҳайси роҳнамо хизмат хоҳад кард. Назар ба гуфтаҳои сардори идораи сиёсати хориҷии Ҷумҳурии Тоҷикистон натиҷаҳои конфронси Душанбе соли ҷорӣ дар конфронсҳои Кобул ва Токио рушди минбаъдаи мантиқӣ ва воқеии худро пайдо хоҳанд намуд.15.40.