Эмомалӣ Раҳмон Ҳамоҳангсози доимии СММ ба ҳузур пазируфт

Душанбе, 2 март. (АМИТ «Ховар»). — Президенти кишвар Эмомалӣ Раҳмон Ҳамоҳангсози доимии Созмони Милали Муттаҳид (СММ), Намояндаи доимии Барномаи рушди ин созмон дар Тоҷикистон Александр Зуевро ба ҳузур пазируфт. Дар мулоқот масоили ҳамкории 20-солаи Тоҷикистону СММ ва дурнамои рушди муносиботи судбахш баррасӣ шуд. Александр Зуев Сарвари давлат Эмомалӣ Раҳмонро бо солгарди 20-уми ба узвияти Созмони Милали Муттаҳид пазируфта шудани Тоҷикистон табрику таҳният гуфта, ба ӯ доир ба натиҷаҳои ҳамкории гуногунҷанбаи 20-сола муфассал иттилоъ дод. Тавре зикр гардид, дар 10 соли охири ҳамкорӣ бо мусоидати СММ дар Тоҷикистон бо харҷи беш аз 600 миллион доллари амрикоӣ лоиҳаҳои сершумор амалӣ гардидаанд. Ҳаҷми кӯмакҳои 20-солаи тавассути СММ ба Тоҷикистон воридшуда бошад, бо назардошти арзиши амалиётҳои посдории сулҳ дар солҳои аввали ҳамкорӣ, ба миллиардҳо доллари амрикоӣ баробар мебошад. Ҳоло намояндагиҳои 22 муассисаи СММ дар минтақаҳои гуногуни Тоҷикистон фаъолият мекунанд, ки беш аз 700 нафар корманд доранд. Дар қаламрави собиқ Иттиҳоди Шӯравӣ ва Аврупои Шарқӣ фаъолияти аз ҳама густурдаи СММ дар Тоҷикистон ба мушоҳида мерасад. Танҳо дар соли 2011 ҳаҷми кӯмакҳои молиявию техникии СММ ба Тоҷикистон ба 70 миллион доллари амрикоӣ баробар шуд. Бо дастгирии муассисаҳои СММ имрӯз дар соҳаҳои кишоварзӣ, рушди деҳот, ҳунарҳои мардумӣ, обрасонӣ, энергетикаи хурд ва ғайра лоиҳаҳои зиёд амалӣ мегарданд. Президенти кишвар Эмомалӣ Раҳмон ба роҳбарияти СММ барои кумакҳои сершумори гузашта ва дастгирии имрӯзаи рушди иҷтимоию иқтисодии Тоҷикистон арзи сипос кард. Александр Зуев низ ба Сарвари давлат Эмомалӣ Раҳмон ва мардуми Тоҷикистон барои ташаббусҳои сершумори судбахш, ки дорои аҳамияти бузурги минтақавию ҷаҳонӣ мебошанд, изҳори миннатдорӣ намуд. Гуфтугӯйи судманд, ҳамчунин доир ба татбиқи босамари нақшаҳои ояндаи ҳамкорӣ сурат гирифт.Дар ин бора ба АМИТ «Ховар» аз Хадамоти матбуоти Сарвари давлат иттилоъ доданд.