Густариши муносиботи Тоҷикистону Озарбойҷон

Душанбе, 6 март. (АМИТ «Ховар», Дилшодаи Хайруллоҳ). — 5 март Президенти Ҷумҳурии Тоҷикистон Эмомалӣ Раҳмон бо вазири рушди иқтисоди Ҷумҳурии Озарбойҷон Шоҳин Мустафоев мулоқот намуд. Шоҳин Мустафоев пас аз мулоқот андешаҳояшро нисбат ба натиҷаҳои он ба хабарнигорон шарҳ дода, аз ҷумла иброз дошт: «имрӯз аввалин ҷаласаи байниҳукуматии Озарбойҷону Тоҷикистон баргузор гардид. Дар ҷаласа зикр гардид, ки ҳамкориҳои байни ҳарду кишвар бо маром рушд доранд. Дар рафти ҷаласа тамоми масоиле, ки барои ҳар ду ҷониб муфид буданд, баррасӣ гардиданд. Вазири Озарбойҷон гуфт, ки дар анҷоми ҷаласа қарор қабул гардид, ки он фарогири ҳамаи масоили баррасишуда аст. «Бояд қайд намоям, ки мо ҳамкориҳои анъанавии қадима дорем, чӣ дар соҳаи иқтисоду иҷтимоӣ ва чӣ фарҳангӣ. Вале дар доираи ин ҷаласа мо самтҳои нави ҳамкориҳои мутақобиларо низ баррасӣ намудем. Аз ҷумла, ҳамкориҳо дар соҳаи маблағгузорӣ ва инчунин соҳибкории Озарбойҷону Тоҷикистон низ метавонад дар ин замина рушд кунад. Мо ба қароре омадем, ки имкон диҳем, то ки соҳибкорони мо бо ҳам вохӯрда, дар доираи конфронсу мулоқот масъалаҳои марбутаро баррасӣ намоянд», — тазаккур дод Ш. Мустафоев.Вай афзуд, ки Озарбойҷон Тоҷикистонро кишвари дӯст медонад ва кишварҳои мо муносибатҳои таърихии сиёсиву иқтисодӣ доранд. Аз ин рӯ, зарур аст, ки ин муносибатҳо боз ҳам густариш дода шаванд.«Моро пас аз гузаронидани ин ҷаласа ҷаноби Президент ба ҳузур пазируфт. Ҷаноби президент муносибатҳои байни ду давлатро баланд баҳогузорӣ намуда, изҳороти ҳайати моро шунида, супоришҳои мушаххасро дар ин самт барои боз ҳам хуб намудани сатҳи ҳамкориҳо баён дошт. Ман ба он назарам, ки соле пас дар мавриди гузаронидани ҷаласаи дуюми байниҳукуматии Тоҷикистону Озарбойҷон, ки дар Боку бояд баргузор шавад, дастовардҳои худро дар ин самт мавриди баррасӣ қарор хоҳем дод», — гуфт вазири Озарбойҷон. Ш. Мустафоев зикр намуд, ки ҳамкориҳои мо заминаи хуб доранд ва мо маҳсулоти якдигарро мавриди хариду фурӯш қарор додаем ва дар ин замина ҳамкориҳои мо боз ҳам рушд хоҳанд ёфт.Мавриди зикр аст, ки гардиши молу маҳсулот байни Озарбойҷон ва Тоҷикистон дар соли 2011 ба миқдори 60 дарсад зиёд гардидааст.,Албатта, ин кофӣ нест ва мо боз имконияти зиёде дорем, ки дар оянда аз онҳо истифода намуда, ҳамкории худро рушд диҳем.