Интихоби беҳтарин кадбонуҳо дар Панҷакент

Душанбе, 3 март. (АМИТ «Ховар», Бекназари Абӯбакр). — Дар шаҳри Панҷакент озмуни «Кадбонуи беҳтарин» бо фарогирии занону бонувони шаҳру деҳоти ноҳия оғоз гардид, ки дар арафаи Рӯзи Модар ҷамъбаст мегардад.Тибқи низомномаи тасдиқгардида, ки дар шартҳои озмун муайян гардидааст, ҳайати кумитаи тадорукот ба ҳунару завқи занону духтарон, ба маҳорати баланди пухтани таомҳои миллӣ, пешниҳоди услуби тарзи ихтирои намуди нави таом ва эҳёи хӯроки миллии фаромӯшгардида, омода намудани дастархон, ҳаракат ва одоби баланди пешниҳоди таом бо қироати шеърҳо дар васфи Модар, баҳор, Наврӯз, малакаи муоширати онҳо диққати махсус медиҳанд.То имрӯз дар маҳаллаҳои Шодиёна, 10 – солагии Истиқлолият, Шафтолузор, Гулистон, Қайнар, Сои Зевон, Суғдиён, Азизобод ва дар ҷамоати деҳоти Ёрӣ, Х.Ҳасан, Л.Шералӣ, Саразм, Чинор, Сӯҷина озмуни «Кадбонуи беҳтарин» дар сатҳи баланд баргузор гардид.Аз хадамоти матбуоти раиси вилояти Суғд ба АМИТ «Ховар» иттилоъ доданд, ки озмуни «Кадбонуи беҳтарин» дар шаҳру деҳоти Панҷакент идома дорад ва он дар арафаи Рӯзи Модар дар тантанаҳои идонаи ҷашнӣ, ки дар Кохи фарҳанг бо иштироки 500 нафар занону бонувони барӯманди Панҷакент баргузор мегардад, ҷамъбаст карда мешавад.