Кӯмак ба ниёзмандон кори савоб аст

Душанбе, 28 март. (АМИТ «Ховар»).-Кумитаи корҳои дини назди Ҳукумати Ҷумҳурии Тоҷикистон дар рӯзҳои Иди байналмилалии Наврӯз ҷиҳати расонидани кӯмаки молиявӣ ба оилаҳои камбизоат, маъюбон ва собиқадорони меҳнат, ятимхонаҳо, мактаб-интернатҳо, хонаҳои пиронсолон корҳои муайянро ба анҷом расонид. Аз ҷумла ба мактаб-интернати № 4 деҳаи Ширинчашмаи ноҳияи Тоҷикобод ба маблағи 8500 сомонӣ, ба ятимдухтарони муассисаи «Чароғи ҳидоят» ба маблағи 3000 сомонӣ кӯмаки молӣ расонида шуд. Илова бар ин Кумитаи корҳои дин дар тарабхонаи «Марҷона» хатнасури 55 нафар тифл аз оилаҳои ниёзмандро аз ҷумлаи кормандони Кумитаи мазкур ва шаҳрвандони шаҳри Душанбею ноҳияҳои атрофи он доир намуд. Боиси зикр аст, ки баргузории корҳои хайриявӣ дар саросари ҷумҳурӣ идома дорад.