Лоиҳаи Кодекси андоз дар таҳрири нав
Душанбе, 16 март. (АМИТ «Ховар», Покиза Махмадбекова). — Дар Вазорати рушди иқтисод ва савдо ҷаласаи корӣ бо соҳибкорони ватанӣ ва коршиносон доир ба лоиҳаи Кодекси андоз дар таҳрири нав баргузор гардид. Вазири рушди иқтисод ва савдо Шариф Раҳимзода дар рафти ҷаласа аҳамияти андешаю пешниҳодҳои соҳибкорони ватанӣ ва коршиносонро доир ба лоиҳаи Кодекси андоз дар таҳрири нав, ки бояд мутобиқ ба вазъи ҷомеа ва талаботи муосир бошад, таъкид намуд. Бино ба иттилои Ш. Раҳимзода, то имрӯз аз ҷониби гурӯҳи кории Вазорат 197 таклифу пешниҳод манзур гардидааст, ки аз онҳо 80-тоаш қабул шуда ва як қисми дигараш мавриди баррасӣ қарор дорад. Ҳамчунин дар идомаи ҷаласаи корӣ фикру андешаҳои иштирокчиёни дигари ҷаласа мавриди баррасӣ қарор мегирад ва таклифҳои асоснок ҷиҳати такмили лоиҳаи Кодекси андоз дар таҳрири нав ба Комиссияи босалоҳият пешниҳод хоҳад шуд.