Машқи таълимӣ барои журналистон

Душанбе, 15 март. (АМИТ «Ховар», Кристина Эрлих). – 16 март дар шаҳри Душанбе тренинг (машқ) – и дурӯза барои журналистон ҷиҳати инъикоси дурусти масъалаҳои бемории сил дар васоити ахбори омма ба кораш шурӯъ мекунад. Дар ин бора аз маркази матбуоти Вазорати тандурустии ҶТ ба АМИТ «Ховар» хабар доданд. Тренингро Вазорати тандурустии ҶТ якҷоя бо лоиҳаи ҲОУП дар Тоҷикистон барои журналистони тоҷикзабони васоити ахбори оммаи электронию чопии ҳамаи минтақаҳои Тоҷикистон созмон додааст. Датсгирии молиявии гузаронидани тренингро Агентии ИМА оид ба ҳамкории байналмилалӣ (ЮСАИД) ва Бунёди ҷаҳонии мубориза бо СПИД, бемориҳои сил ва вараҷа ба ӯҳда доранд.Тренингро мутахассисон – фтизиатрҳо аз қабили сармутахассиси Вазорати тандурустии ҶТ оид ба масъалаҳои бемории сил Қурбонгул Зокирова, муовини директори Маркази ҷумҳуриявии мубориза ба бемории сил Зоир Абдуллоев, ҳамоҳангсози оид ба равобит бо аҳли ҷамъияти Маркази ҷумҳуриявии мубориза бо бемории сил Фирӯза Саидова, ҳамчунин ҳуқуқшиносони Вазорати тандурустии ҶТ рӯи кор меоранд. Журналистон аз рӯи натиҷаи тренинг, ки корашро 17 март анҷом медиҳад, шаҳодатнома мегиранд. Ғайр аз ин, онҳо бояд вақтҳои наздиктарин маводи заруриро дар мавзӯи бемории сил манзури васоити ахбори омма намоянд.