Машварати намояндагони мақомоти ҳифзи ҳуқуқ

Душанбе, 29 март. (АМИТ «Ховар», Лутфия Эшонқулова). – 29 – 30 март дар Агентии назорати маводи нашъаовари назди Президенти ҶТ мулоқоти байниидоравии кории намояндагони мақомоти ҳифзи ҳуқуқи панҷ кишвар – Тоҷикистон, Афғонистон, Қирғизистон, Федератсияи Русия ва ИМА баргузор мегардад. Тавре аз дафтари матбуоти Агентии назорати маводи нашъаовар ба АМИТ «Ховар» хабар доданд, дар ҷараёни машварат масъалаҳои марбут ба роҳандозӣ намудани амалиёти муштарак барои ҷилавгирии қочоқи маводи нашъаовар дар минтақа мавриди муҳокима қарор мегиранд.«Байни идораҳои дахлдори кишварҳои зикршуда табодули фаврии иттилоотӣ аз рӯи масъалаҳои муборизаи зидди гардиши ғайриқонунии маводи нашъаовар ба роҳ монда шудааст. Ин имкон медиҳад, ки гурӯҳҳои муташаккили ҷинояткор сари вақт ошкор намуда ва безарар гардонида шаванд. Чунин ҳамкорӣ заминаи тадриҷан ба эътидол овардани вазъияти минтақаро фароҳам меорад», — қайд намуд манбаъ.