Муаррифии лоиҳаҳои тозабунёд

Душанбе, 19 март. (АМИТ «Ховар», Бекназари Абӯбакр). — Чанде пеш раиси вилояти Суғд Қоҳир Расулзода дар маркази вилоят бо нақшаи муфассали лоиҳаҳое, дар миқёси вилоят аз ҷониби меъморони шаҳру навоҳии вилоят пешниҳод гардидаанд, ошно шуд. Аз хадамоти матбуоти раиси вилояти Суғд ба АМИТ «Ховар» иттилоъ доданд, ки меъморони 16 шаҳру навоҳии вилоят лоиҳаҳои нави худро ба раиси вилоят муаррифӣ намуданд. Раиси вилоят ба лоиҳаҳо меъморони шаҳри Хуҷанд бо назардошти маркази вилоят будан, зиёд будани рафтуомади меҳмонон таваҷҷӯҳи бештар зоҳир кард. Лоиҳаҳо ташкили боғчаҳои бачагона барои 250 ҷой дар маҳаллаҳои чорум ва панҷум, маркази савдо ва тиҷорат дар кӯчаи Ленин- 5, бунёди хонаҳои истиқоматӣ, маркази савдо ва хизматрасонӣ дар маҳаллаи 13-уми шаҳр, ташкили бинои нави иловагӣ барои шӯъбаи корҳои дохилӣ, лоиҳаи ободонӣ ва кабудизоркунӣ дар кӯчаҳои С.Умаров ва «30- солагии Ғалаба»-ро фаро мегиранд.Нақшаи ободонӣ ва кабудизоркунӣ ва ороишоти идонаи маркази шаҳри Исфара низ хеле хуб тарҳрезӣ гардида, дар он бунёди манзилҳои баландошёна дар масоҳати 830 гектар, ташкили бинои нави мактаби таҳсилоти ҳамагонии рақами 28 дар ҷамоати Чоркӯҳ барои 360 нафар толибилм, сохтмони маҷмааи варзишӣ дар ҷамоати Сурх ва ташкили биноҳои савдои соҳибкорон Деҳқонов ва Баҳоваддинов ба нақша гирифта шудаанд.