Мулоқот бо сафири Куба дар ДСРС

Душанбе, 16 март. (АМИТ «Ховар», Людмила Дубинина). – Дар арафаи 20 – солагии барқароршавии муносибатҳои дипломатии Тоҷикистон ва Куба дар Донишгоҳи славянии Русия ва Тоҷикистон мулоқоти аъзои раёсати Ҷамъияти «Тоҷикистон — Куба» бо сафири Куба дар ҶТ Абелардо Фабио Эрнандес Ферреро баргузор гардид. Раиси раёсати Ҷамъияти «Тоҷикистон — Куба», доктори илми таърих, профессор Ҷӯра Латифов аз фаъолияти ҷамъияти мазкур нақл карда, нақшаҳои кори ояндаи онро баён намуд. Ҷ.Латифов иброз дошт, ки фаъолони ҷамъият вазифаи худро дар васеъ намудани доираи дӯстдорони Куба, байни ҷавонон тарғибу ташвиқ намудани фарҳанг ва санъати халқи Куба мебинанд. Дар ин росто конфронсҳои хонандагон аз рӯи асарҳои нависандагони маъруфи Куба роҳандозӣ шуданд. Ҷамъият ният дорад, ки дар Мактаби мусиқии рақами 1 – уми шаҳри Душанбе гӯшаи «Куба дар партави дӯстӣ» — ро кушояд ва бо мадади Иттифоқи нависандагони ҶТ асарҳои нависандагону драматургҳои Кубаро ба забони тоҷикӣ тарҷума намояд.Хотирнишон месозем, ки аъзои Ҷамъияти «Тоҷикистон – Куба» ки соли 2006 таъсис ёфта буд, иборат аз рассомон, иқтисоддонон, олимон, ходимони фарҳанг, мутрибон ва ғайра мебошанд.