Мулоқоти Гул Шералӣ бо Сафири Норвегия

Душанбе, 6 март. (АМИТ «Ховар», Дилшодаи Хайруллоҳ).- Имрӯз дар Вазорати энергетика ва саноати Ҷумҳурии Тоҷикистон вохӯрии Вазири энергетика ва саноати Ҷумҳурии Тоҷикистон Гул Шералӣ бо Сафири Шоҳигарии Норвегия дар Ҷумҳурии Тоҷикистон ҷаноби Даг М. Халворсен баргузор гардид. Дар вохӯрӣ масъалаҳои ҳамкориҳо вобаста ба ҷараёни корҳо дар самти беҳтар гардонидани фазои сармоягузорӣ дар бахши бунёди нерӯгоҳҳои хурди барқи обӣ, муайян намудани имкониятҳо доир ба татбиқи лоиҳа доир ба бунёди нерӯгоҳҳои хурди барқи обӣ мавриди баррасӣ қарор дода шуд. Ҷонибҳо аз натиҷаҳои ҳамкорӣ изҳори қаноатмандӣ намуда, ҳамчунин иброз доштанд, ки ҳамкориҳои дуҷониба дар бахшҳои зикргардида минбаъд густариш хоҳад ёфт. Ёдовар мешавем, ки Ёддошти тафоҳум байни Вазорати энергетика ва саноати Ҷумҳурии Тоҷикистон ва Вазорати корҳои хориҷии Шоҳигарии Норвегия аз 29 апрели соли 2010 ба имзо расидааст. Ҳамчунин дар доираи тафоҳумнома Маркази Тоҷикистону Норвегия ва Комиссияи байниидоравӣ ташкил дода шудааст.