Мулоқоти Президенти Тоҷикистон бо Осиф Алӣ Зардорӣ

Душанбе, 25 март. (АМИТ «Ховар»). — Ҳолати кунунӣ ва дурнамои муносиботи дӯстӣ ва ҳамкории гуногунҷанбаи Тоҷикистону Покистон дар мулоқоти хосаи сарони ду давлат Эмомалӣ Раҳмон ва Осиф Алӣ Зардорӣ ва баъдан зимни музокироти расмӣ бо иштироки ҳайатҳои васеъ мавриди муҳокима қарор гирифт. Сарвари давлати Тоҷикистон Эмомалӣ Раҳмон бо ёдоварӣ аз пайвастагӣ ва муҳтавои мулоқотҳои сатҳи олии миёни ду кишвар изҳори боварӣ намуд, ки рушди робитаҳои сиёсӣ, иқтисодию тиҷоратӣ, сармоягузорӣ, нақлиётӣ, энергетикӣ, саноатӣ, кишоварзӣ ва ҳам амниятии Тоҷикистону Покистон натанҳо ба нафъи ҳарду кишвар, балки кулли минтақа, аз ҷумла Афғонистон мебошад. Аз густариши бесобиқаи робитаҳои сохторҳои давлатӣ ва соҳибкорону тоҷирони ду кишвар, ки боиси афзоиши намоёни ҳаҷми муомилоти молу маҳсулот миёни ду кишвар гардидааст, изҳори хушҳолӣ карда шуд. Ба идомаи машваратҳои судманди сиёсӣ ва таҳкиму густариши ҳамкории миёни сохторҳои низомӣ ва ҳифзи ҳуқуқу тартиботи ду кишвар дар мубориза бо терроризму ифротгароӣ ва дигар хатарҳои ҷаҳони муосир низ изҳори ҳавасмандӣ карда шуд.Дар ин бора ба АМИТ «Ховар» аз Хадамоти матбуоти Президенти Ҷумҳурии Тоҷикистон иттилоъ доданд.