Муносиботи Тоҷикистону Қатар дӯстонаанд

Душанбе, 27 март. (АМИТ «Ховар», Дилшодаи Хайруллоҳ).- «Чанде қабл ман ба сӯҳбати Ҷаноби Олӣ, Президенти Тоҷикистон Эмомалӣ Раҳмон мушарраф гардидам ва ба эшон салому паёми амири Қатарро расонидам», — гуфт пас аз мулоқот бо Президенти Ҷумҳурии Тоҷикистон Эмомалӣ Раҳмон муовини вазири корҳои хориҷии Давлати Қатар Алӣ ибни Фаҳд ал- Хоҷирӣ.Вай афзуд: мо зимни мулоқот дар бораи муносибатҳои дӯстонаи байни ду кишвар мубодилаи афкор кардем. Ҷойи шубҳа нест, ки робитаҳои Тоҷикистону Қатар ҳамин гуна идома меёбанд. Яке аз дастовардҳои муҳими мо кушоиши сафорати Қатар дар Душанбе ва сафорати Тоҷикистон дар Доҳа мебошад. Орзуи онро дорем, ки муносибатҳои мо бо Тоҷикистон дар соҳаҳои иқтисодӣ, сармоягузорӣ, фарҳангӣ, инчунин дигар бахшҳо густариш меёбанд.«Ман аз фурсат истифода бурда, ба Президенти Тоҷикистон барои доир кардани чунин як конфронс роҷеъ ба Афғонистон миннатдории худро баён мекунам ва боварӣ дорам, ки ин конфронс барои пешрафту шукуфоии кишвари Афғонистон мусоидат хоҳад кард», — тазаккур дод дар хотима Алӣ ибни Фаҳд ал- Хоҷирӣ.