Мусодираи нӯшокиҳои спиртӣ бе тамғаи аксизӣ
Душанбе, 2 март. (АМИТ «Ховар», Дилшодаи Хайруллоҳ).- Дар натиҷаи гузаронидани корҳои назоратӣ аз ҷониби кормандони нозироти андози шаҳри Хучанд беш аз 15 ҳазор адад нӯшокии спиртӣ мусодира карда шуд. Сабаби мусодираи маҳсулоти мазкур бе тамғаи аксизӣ будани онҳост. Нӯшокиҳои спиртӣ аз анборе дар назди автовокзали қасабаи 34 дарёфт гардиданд. Ҳангоми наворбардорӣ ва мусодираи маҳсулот соҳибони он ба ҷои ходиса наомаданд. Мутобиқи маълумот маҳсулоти мусодирагардида аслан ба ҶДММ “Куруш”- и ноҳияи Спитамен, “Сомғор”-и ноҳияи Бобоҷон Ғаффуров, “Хайём”, “Шароб” ва “Шоҳин”-и шаҳри Хуҷанд тааллуқ дорад. Ҳама намуди нӯшокиҳои спиртии фурӯшӣ бояд тамғаи аксизӣ дошта бошанд. Масъулин иброз доштанд, ки амалиётро онҳо сари вақт иҷро намуданд, вагарна дар акси ҳол нӯшокиҳои спиртии зикршуда, ки шумораи зиёдро ташкил медоданд, бе тамғаи аксизӣ ба муомилот бароварда мешуданд. Тибқи қонунгузории ҷорӣ барои ҳар як литр арақ 1 евро андоз муқаррар шудааст. Ҳарчанд маблағи муқарраршудаи андози аксизӣ он қадар гарон набошад ҳам, бо вуҷуди ин истеҳсолкунандагон ва фурӯшандагони маҳсулоти зераксизӣ дар ин самт ба қонуншиканиҳои зиёд роҳ медиҳанд. Лозим ба таъкид аст, ки соли 2011 дар вақти гузаронидани корҳои назоратӣ 19 ҳазору 192 шиша нӯшокии спиртии бе тамғаи аксизӣ мусодира карда шуд. Дар маҷмӯъ, аз ҷониби мутахассисони нозироти андози шаҳри Хуҷанд аз оғози соли равон 21 ҳазору 758 шиша нӯшокии спиртӣ, ки зиёда аз 40 намудро ташкил медиҳад, мусодира карда шуд, ки ин миқдор нисбат ба тамоми давраи соли гузашта зиёд мебошад. Мутахассисони соҳа бо мақсади пешгирии ҳама гуна қонуншиканиҳо дар истеҳсол ва фурӯши маҳсулоти зераксизӣ нақша доранд назоратро боз ҳам пурзӯр намуда, ба ин восита воридоти маблағи андоз аз маҳсулоти зераксизиро ба буҷа пурра ва сари вақт таъмин намоянд.