Мусоидати сафорат ба шаҳрвандон

Душанбе, 14 март. (АМИТ «Ховар», Бекназари Абӯбакр). — Сафорати Ҷумҳурии Тоҷикистон дар Федератсияи Русия хабар медиҳад, ки 10 марти соли равон дар натиҷаи сӯхтор дар мағозаи хӯроквории «Карина», воқеъ дар шаҳраки Белопесотскийи ноҳияи Ступинаи вилояти Маскав чанд тан, аз ҷумла ду шаҳрванди Ҷумҳурии Тоҷикистон — Шоҳназари Шоҳмурод, соли таваллудаш 1992, сокини ноҳияи Фархори вилояти Хатлон ва Ҳасанов Сангалӣ Савзалиевич, соли таваллудаш 1990, сокини ноҳияи Восеи вилояти Хатлон осеб дидаанд.Онҳо пас аз вуқӯи ҳодиса дарҳол ба шифохонаи марказии ноҳияи мазкур оварда шуда, аз он ба баъд пайваста зери муоинаи табибон мебошанд.Хадамоти матбуоти Сафорати Ҷумҳурии Тоҷикистон дар Федератсияи Русия хабар медиҳад, ки Сангалӣ дар сӯҳбати телефонӣ ба корманди Сафорат зикр дошт, ки ӯ ҳангоми сар задани сӯхтор дар дӯкони масолеҳи бинокорӣ, воқеъ дар наздикии мағозаи «Карина» қарор дошт ва бо дидани оташсӯзӣ ба он сӯй шитобид. Бо ворид шудани Сангалӣ ба мағоза таркиш ба вуқӯъ пайваст ва дар натиҷа ӯ осеб дид.Бино ба таъкиди табибон, ҷароҳати Шоҳназару Сангалӣ ҷароҳати дараҷаи миёна буда, вазъи онҳо дар ҳоли ҳозир мӯътадил аст.Ҳодиса мавриди пайгирии сафорат қарор дорад.