Намоиши маҳсулоти Тоҷикистону Афғонистон
Душанбе, 27 март. (АМИТ «Ховар», Покиза Маҳмадбекова). – Дар ҳошияи Конфронси панҷуми ҳамкории иқтисодии минтақавӣ оид ба Афғонистон (RECCA-V) дар шаҳри Душанбе ҷамъомади тоҷирон баргузор гардида, намоишгоҳе ифтитоҳ шуд, ки дар он ширкатҳои Тоҷикистону Афғонистон маҳсулоти худро ба маърази намоиш гузоштанд. Мувофиқи суханони раиси Палатаи савдо ва саноати ҶТ Шариф Саид, намоишгоҳ омили асосии рушду ривоҷи равобити самарабахши аҳли тиҷорат ва табодули иттилоот гардид. Саҳми палатаҳои савдо ва саноати Тоҷикистону Афғонистон барои таҳким бахшидани муносибатҳои мутақобилан муфид сол аз сол меафзояд. Соли 2011 муомилоти савдои хориҷии байни ҳар ду давлат нисбат ба соли 2010 хеле афзуд, ки бунёди роҳҳои нави мошину қаторагард, нерӯгоҳҳои барқи обӣ ва хатҳои интиқоли барқ дар ин амр мақоми хоса доштанд. Дар намоишгоҳ маҳсулоти бахшҳои гидроэнергетика, ҳавопаймоӣ, саноати алюминий, сабук, хӯрокворӣ, дорусозӣ ва маснуоти косибони Афғонистон ба маърази намоиш гузошта шуд.