Нашри падидае дар фарҳанги ҷаҳонӣ

Душанбе, 19 март.(АМИТ «Ховар», Марзия Саидова).-«Наврӯз ҳамчун падидае дар фарҳанги ҷаҳонӣ», чунин ном гирифтааст таҳқиқоти академии донишмандони тоҷик, ки дар остонаи ҷашни байналмилалии Наврӯз 19 март дар Академияи илмҳои ҷумҳурӣ бо иштироки муҳаққиқони шинохтаи тоҷик ва намояндагони корпуси дипломатии муқими Тоҷикистон муаррифӣ гардид. Китоби мазкур бо ибтикори Пажӯҳишгоҳи таърих, бостоншиносӣ ва мардумшиносии Академияи илмҳои ҷумҳурӣ, Китобхонаи миллии Тоҷикистон ва Маркази байналмилалии илмии мусиқии мардумони Шарқ (Борбад) дар нашриёти «Контраст»-и Душанбе ба забонҳои русӣ ва англисӣ ба табъ расидааст. Мураттибони китоб донишмандони шинохтаи тоҷик Аскаралӣ Раҷабзода ва Муҳаммадраҳим Каримзода заҳмати зиёд ба харҷ дода беҳтарин мақолаҳои олимони кишварҳои ҷаҳон, амсоли Тоҷикистон, Эрон, Фаронса, Русия ва Амрикоро, ки ба хусусиятҳои ҷашни байналмилалии Наврӯз бахшида шудаанд, гирд овардаанд. Бори нахуст мақолаҳои олимони тоҷик ва хориҷӣ дар шакли маводи таҳлилии типологӣ, сарчашмаҳои хаттӣ дар китоб баррасӣ гардидаанд. Китоб дорои моҳият ва арзиши баланди илмию таърихӣ буда, нақш ва асолати Наврӯз ҳамчун падидаи нек дар фарҳанги ҷаҳонӣ маънидод гардидааст. Зимни муаррифии китоб донишмандони шинохтаи тоҷик Акбар Турсон, Саъдулло Раҳимов, Рӯзии Аҳмад, Юсуф Нуралиев, Муҳаммадраҳим Каримзода ва Сафири фавқулодда ва мухтори Фаронса дар Ҷумҳурии Тоҷикистон Анри Зиппер де Фабианӣ, кормандони масъули Сафорати Покистон ва Туркия дар Душанбе Муҳаммади Алӣ ва Алӣ Мурод доир ба вижагиҳои хоси Наврӯз, таърих ва пайдоиши ин ҷашни бузурги ориёитаборҳо ибрози назар намуда, Наврӯзро, ки ҷашни қадимаи байналмилалист, эҳёи табиат, пирӯзии нур бар зулмот, некандешию хайрхоҳӣ, муттаҳидию сарҷамъӣ ва орзую омоли неки мардумон арзёбӣ карданд.