Нигаронӣ аз банд будани роҳ

Душанбе, 9 март. (АМИТ «Ховар», Сӯҳбатулло Иноятуллоев).- Тайи чанд ҳафтаи охир бо сабаби бориши зиёди барф ва фаромадани тарма дар роҳҳои мошингарди манотиқи ҷумҳурӣ мардуми баъзе аз ноҳияҳо ва шаҳрҳо ба мушкилиҳо дучор шудаанд. Аз ҷумла, дар рӯзҳои охир мардуми ҷамоати Сағирдашти ноҳияи Дарвоз аз кам будан ё умуман набудани маводи хӯрокӣ дар мағозаҳо: орд, равған, макарон ва шакар азият мекашанд. Ногуфта намонад, ки ҳамасола дар ин деҳаи дурдаст барфи зиёд меборад ва дар ин сол баландии барф аз 1,5 то ба 2,5м расидааст. Аз меъёр баланд будани сатҳи барф ва дер омадани баҳор, ҳамчунин норасоии хӯроки чорво ва ба итмом расидани сӯзишворӣ барои мардум душвории зиёд пеш овардааст. Ҳамин тариқ, ба гуфти роҳсозон онҳо чанд рӯз аст, ки ба тозаву бартараф кардани барфи роҳҳо машғуланд ва то як ё ду рӯзи оянда роҳ кушода хоҳад шуд, аммо хавфи омадани тарма дар назар аст.