О. Оқилов: «Ҷараёни корҳои наврӯзиро вусъат бахшед»

Душанбе, 15 март. (АМИТ «Ховар», Дилшодаи Хайруллох).-14 март дар ҳузури Сарвазири Ҷумҳурии Тоҷикистон Оқил Оқилов ҷаласаи навбатии Кумитаи тадорукоти омодагӣ ба таҷлили ҷашни байналмилалии Наврўз — 2012 баргузор гардид. Сарвазири мамлакат Оқил Оқилов доир ба рафти омодагиҳо ба таҷлили ҷашни Наврўз ва иҷрои нақшаи чорабиниҳои ба ин мақсад равонашуда изҳори назар карда таъкид дошт, ки рафти омодагиҳо дар айни замон мувофиқи матлаб ба роҳ монда шуда, тадбирҳои тайёрӣ ба баргузории ҷашн бо маром идома доранд.Тавре ки таъкид шуд, корҳои омодагӣ дар бисёр самтҳо барои таҷлили сазовори ҷашни байналмилалии Наврўз-2012 дар пойтахти мамлакат- шаҳри Душанбе анҷом ёфта, корҳои ободонию ороишӣ ва ташкилу таҳияи барномаҳои фарҳангию оммавӣ дар сатҳи зарурӣ идома доранд.Чорабиниҳои асосии таҷлили ҷашни байналмиллалии Наврўз-2012 мувофиқи нақша дар пойтахти ҷумҳурӣ- шаҳри Душанбе бо иштироки ҳайати меҳмонони кишварҳои хориҷӣ ҷараён гирифта, аз барномаҳои идонаи фарҳангӣ, намоиши дастоварду ҳунарҳои мардумӣ, ташкили намоиши маҳсулоти гуногун ва чорабиниҳои оммавии варзишӣ иборат мебошанд. Оқил Оқилов роҳбарони вазорату идораҳои дахлдор ва дигар шахсони масъулро вазифадор кард, ки ҷиҳати дар мӯҳлати кӯтоҳ анҷом додани корҳои омодагӣ ва ташкили чорабиниҳои миллии наврӯзӣ тадбирҳои амалӣ андешида, ҷараёни корҳои ободонию ороишии мавзеъҳои баргузории чорабиниҳои идонаро ба истиқболи ҷашни байналмилалии Наврӯз вусъат бахшанд.