Омодагӣ ба мавсими нави футбол-2012

Душанбе, 28 март. ( АМИТ «Ховар», Аловиддин Бӯриев).- Дастаҳои футболи мамлакат омодагии хешро ба мавсими нави футбол ба анҷом мерасонанд. “Энергетик”-и Душанбе дар варзишгоҳи шаҳри Норак бозии таҷрибавии худро бо дастаи ҷадиди лигаи олӣ- “Зарафшон”-и Панҷакент барпо намуда, бо натиҷаи қотеъи 5 бар 0 пирӯз шуд. Дар ин дидор ҳамлагари дастаи мунтахаби кишварамон Шодибек Ғаффоров ду тӯб зад. Дар ҳайати дастаи “Энергетик” ду нафар футболбоз аз Гана- Феликс Бафое ва Кеннеди аз назари мураббиён мегузаранд. Ба даста ҳамчунин Абдулло Саидов ва Худойдод Нусратов аз “Шодмон”-и Ҳисор шомил шудаанд. Дастаи “Равшан”-и Кӯлоб, ки дар Қайроққум машғулиятҳои худро мегузаронад, дар мусобиқа бо дастаи “Парвоз” бо ҳисоби 3 бар 2 пирӯз гардид.