Парлумон шартҳои будубоши дафтари САҲА-ро баррасӣ кард

Душанбе, 5 март.(АМИТ «Ховар», Марзия Саидова).-Вакилони Парлумони Тоҷикистон 5 март як қатор санадҳои байналмилалиро дар ҷаласаи Шӯро, ки дар ҳузури Раиси Маҷлиси намояндагон Шукурҷон Зуҳуров баргузор гардид, баррасӣ намуданд. Муҳаммадато Султонов, котиби матбуотии Маҷлиси намояндагон иттилоъ дод, ки аъзои Шӯро Созишнома дар бораи ҳамкории Вазорати корҳои дохилӣ (политсия)-и кишварҳои Иттиҳоди Давлатҳои Мустақил дар мубориза бар зидди хариду фурӯши одамон, лоиҳаи низомномаи дастгоҳи Маҷлиси намояндагони Маҷлиси Олии Ҷумҳурии Тоҷикистон дар бораи ташкили гурӯҳи дӯстии Маҷлиси намояндагон бо Сейм /парлумон/-и Лаҳистон, дар бораи ёддошти тафоҳум байни Ҳукумати Ҷумҳурии Тоҷикистон ва Созмони амнияту ҳамкории Аврупо /САҲА/ дар бораи шартҳои буду боши дафтари САҲА дар Ҷумҳурии Тоҷикистонро мавриди баррасӣ қарор доданд. Ҳамзамон дар ҷаласа лоиҳаи Қонуни Ҷумҳурии Тоҷикистон «Дар бораи ташкилотҳои маблағгузори хурд» муҳокима гардида, нисбат ба масъалаҳои баррасишуда аъзои Шӯро пешниҳодҳои ҷолиб ироа намуданд.