Савдои чаканаи мол афзоиш меёбад

Душанбе, 29 март. (АМИТ «Ховар», Покиза Маҳмадбекова). – Тайи ду моҳи соли равон дар Тоҷикистон савдои чаканаи мол нисбат ба моҳҳои январ ва феврали соли гузашта 16,7 фоиз афзудааст.Мувофиқи маълумоти Агентии омори назди Президенти ҶТ, ҳаҷми умумии савдои чаканаи бозор ва сохторҳои дигари тиҷоратӣ беш аз 1 миллиарду 400 миллион сомониро ташкил дод.Вазни қиёсии муомилоти моли бахши ғайридавлатии савдо дар давраи зикршуда 98,8 фоизи ҳаҷми умумиро ташкил дод. Вазни қиёсии молҳои озуқавӣ дар ҳаҷми умумии муомилоти амвол баробари 47,8 фоиз ё беш аз 664 миллиону 200 ҳазор сомонӣ буд. Дар давраи гузашта ҳаҷми хизматрасонии меҳмонхонаю тарабхонаҳо 82 миллиону 100 ҳазор сомониро ташкил дод, ки нисбат ба ҳамин давраи соли 2011 баробари 8,9 фоиз зиёд аст.