Шарикони асосии тиҷоратии ҶТ

Душанбе, 15 март. (АМИТ «Ховар», Покиза Маҳмадбекова). – Муомилоти савдои хориҷии Тоҷикистон тайи моҳҳои январ – феврали соли 2012 беш аз 827 миллиону 100 ҳазор долларро ташкил дод, ки назар ба нишондиҳандаи ҳамин давраи соли 2011 баробари 9,3 фоиз ё 70 миллиону 400 ҳазор доллари ИМА зиёд аст.Мувофиқи маълумоти Агентии омори назди Президенти ҶТ, баланси тиҷоратӣ хусусияти манфӣ дошта ва беш аз 415 миллиону 300 ҳазор доллари ИМА – ро ташкил дод. Дар давраи гузашта Тоҷикистон бо 74 кишвари ҷаҳон, аз ҷумла бо 9 кишвари аъзои ИДМ ва 65 кишвари хориҷи дур муносибатҳои тиҷоратӣ дошт. Мувофиқи хабари Агентӣ, камбуди баланси тиҷоратӣ бо кишварҳои ИДМ беш аз 308 миллион доллар ва бо мамлакатҳои хориҷи дур 107 миллиону 300 ҳазор доллари ИМА – ро ташкил дод. Дар давраи зикршуда содироти амвол беш 205 миллиону 900 ҳазор доллар ва воридоти он зиёда аз 621 миллиону 200 ҳазор доллари ИМА буд. Шарикони асосии тиҷоратии ҶТ дар муомилоти савдои берунӣ Русия, Қазоқистон, Туркманистон, Чин, Туркия ва Эрон ба шумор мераванд.