Соҳибкорони афғон дар Душанбе

Душанбе, 23 март.(АМИТ «Ховар», Марзия Саидова).- Фардо дар Палатаи савдо ва саноати ҷумҳурӣ муаррифии Анҷумани соҳибкорон ва намоишгоҳи байналмилалӣ, ки дар доираи баргузории панҷумин конфронси ҳамкории иқтисодӣ, минтақавӣ оид ба Афғонистон (RECCA-V), ташкил мегардад, баргузор мешавад. Аз Палатаи савдо ва саноати ҷумҳурӣ ба АМИТ «Ховар» иттилоъ доданд, ки дар муаррифии ин чорабиниҳо ҳайати соҳибкорони Афғонистон ширкат менамоянд. Мавриди зикр аст, ки дар кори конфронси мазкур, ки рӯзҳои 26-27 марти соли равон дар Душанбе баргузор мешавад, Сарони кишварҳои Афғонистон, Покистон ва Эрон Ҳомид Карзай, Алӣ Осиф Зардорӣ ва Маҳмуд Аҳмадинажод низ ширкат ва суханронӣ менамоянд. Тибқи маълумоти кумитаи тадорукоти конфронс, дар ин чорабинӣ ҳамзамон намояндагони 40 кишвари ҷаҳон дар сатҳи вазирони корҳои хориҷӣ ва 33 созмонҳои байналмилалӣ даъват шудаанд. Интизор меравад, ки дар ҷараёни кори конфронс як қатор лоиҳаҳо дар бахши энергетика, саноат, сохтмони роҳҳо, омодасозии мутахассисон барои Афғонистон муаррифӣ хоҳанд шуд.