Таҷдиди боз як гузаргоҳи зеризаминӣ дар маркази шаҳр

Душанбе, 5 март.(АМИТ «Ховар», Марзия Саидова).- Шаҳрдории Душанбе баҳри дарёфт ва интихоби беҳтарин лоиҳаи ангории навсозии гузаргоҳи зеризаминӣ воқеъ дар чорроҳаи хиёбони Рӯдакӣ -кӯчаи Фотеҳ Ниёзӣ озмун эълон менамояд. Озмун дар як давр баргузор гардида, дар он шахсони воқеиву ҳуқуқӣ ва мутахассисони ватанӣ имкони иштирок карданро доранд. Дар асоси қарори шаҳрдори Душанбе шартҳои озмун тасдиқ гардидаанд. Озмун то 27 марти соли равон идома ёфта, довталабон дархостҳои худро метавонанд ба Раёсати сохтмони асосии шаҳри Душанбе пешниҳод созанд. Бояд тазаккур дод, ки гузаргоҳи зеризаминии чорроҳаи хиёбони Рӯдакӣ -кӯчаи Фотеҳ Ниёзӣ нимаи солҳои 1970 сохта шуда, дохили он баъд аз замони истиқлолият ба растаи гулфурӯшон ва рӯзномаю китобфурӯшон табдил дода шудааст. Алҳол дар пойтахт бо мақсади таъмини бехатарии ҳаракати пиёдагардон ҳудуди 10 гузаргоҳи зеризаминӣ фаъолият дорад.