Вазъи роҳҳои Тоҷикистон

Душанбе, 19 март. (АМИТ «Ховар», Кристина Эрлих). – «Якзайл фуромадани тарма, шамоли сахт ва боришоти сахти барф вазъияти роҳҳои Тоҷикистонро мушкил месозанд», — хабар дод ба АМИТ «Ховар» сардори шӯъбаи идораи фаъолияти фаврии Вазорати нақлиёти ҶТ Владимир Багуманов.Мувофиқи суханони мавсуф, дар ҳоли ҳозир роҳи мошингарди «Душанбе – Хуҷанд», ҳамчунин, роҳҳои ноҳияҳои Дарвоз, Ванҷ, Рӯшон, Шуғнон, Роштқалъа ва Ишкошим пурра баста шудаанд. Ғайр аз ин, роҳи мошингарди «Ваҳдат — Рашт – Ҷиргатол» — и ҳамсарҳад бо Қирғизистон ва ағбаи «Истиқлол» баста шудааст. «Аз 8 ноябр то имрӯз дар Тоҷикистон беш аз 50 маротиба барф борид. Боришоти барф, шамоли сахт ва яхбандӣ боиси мураккаб гардидани вазъи роҳҳои Тоҷикистон шуданд. Ҳоло барои аз барф тоза кардани роҳҳо ҳамаи чораҳо дида шуда, ҷараёни ин корҳо таҳти назорати Вазорати нақлиёти ҶТ қарор доранд», — хабар дод манбаъ.