Қӯрғонтеппа тарҳашро тағйир медиҳад

Душанбе, 5 апрел.(АМИТ «Ховар», Марзия Саидова).-Тарҳи шаҳри Қӯрғонтеппа –маркази маъмурии вилояти Хатлон тағйир дода мешавад. Вобаста ба он палатаи болоии парлумони Тоҷикистон –Маҷлиси миллӣ дар иҷлосияи ҳаштуми худ тибқи пешниҳоди Ҳукумати Ҷумҳурии Тоҷикистон ва илтимосномаи Маҷлиси вакилони халқи вилояти Хатлон дар мавриди тағйир додани тарҳи шаҳри Қӯрғонтеппа қарор қабул намуд. Матлубахон Сатторова, узви Маҷлиси миллӣ зимни тавзеҳи масъалаи мазкур гуфт, ки Ҳукумати Ҷумҳурии Тоҷикистон бо Қарори худ аз 12 декабри соли 2011 раисони вилояти Хатлон, ноҳияҳои Бохтар ва Вахш, инчунин Кумитаи давлатии заминсозӣ ва геодезии Ҷумҳурии Тоҷикистон ва Агентии сохтмон ва меъмории назди Ҳукумати ҷумҳуриро вазифадор кардааст, ки бо тартиби муқарраргардида ба тавозуни шаҳри Қӯрғонтеппа додани қитъаҳои заминро дар масоҳати 1775, 82 гектар, аз ҷумла 1612, 04 гектар замин аз ноҳияи Бохтар ва 163, 78 гектар аз ҳисоби заминҳои ноҳияи Вахш таъмин намоянд. Дар асоси лоиҳаи пешниҳодшуда, тарҳи шарҳи Қӯрғонтеппа дар масоҳати 2568, 15 гектар муқаррар карда мешавад. Матлубахон Сатторова афзуд, ки дар маҳалҳои аҳолинишини ноҳияҳои Бохтар ва Вахш, ки ба тавозуни шаҳри Қӯрғонтеппа дода мешаванд, беш аз 27 ҳазор аҳолӣ истиқомат доранд, ки дар оянда онҳо сокинони маркази маъмурии вилояти Хатлон –шаҳри Қӯрғонтеппа мегарданд. Васеъ намудани ҳудуди марзиву маъмурии шаҳри Қӯрғонтеппа талаботи замон ва амри зарурист ва ҷиҳати рушду густариши Қӯрғонтеппа ҳамчун маркази маъмурии вилояти Хатлон мусоидат менамояд. Вилояти Хатлон, воқеъ дар ҷануби Тоҷикистон яке аз вилоятҳои калонтарин буда, дорои қариб 3 миллион аҳолист.