Қатъи ҳаракати нақлиёт дар Теҳрон

Душанбе, 5 апрел.(АМИТ «Ховар», Марзия Саидова).- Шурӯъ аз 5 апрел то 8 майи соли равон ҳаракати воситаҳои нақлиётӣ дар роҳи мошингарди кӯчаи Теҳрон (аз буриши хиёбони Рӯдакӣ то кӯчаи Шероз) қатъ карда мешавад. Дар робита ба ин раиси шаҳри Душанбе Маҳмадсаид Убайдуллоев, ҷиҳати андешидани чораҳо доир ба таъмини бехатарии ҳаракати нақлиёт дар кӯчаи Теҳрон қарори марбута ба тасвиб расонд. Тибқи он Раёсати воҳиди махсуси Вазорати корҳои дохилии Ҷумҳурии Тоҷикистон (Маҷидов Ҳ.) ва Раёсати корҳои дохилии шаҳри Душанбе (Бузмаков А.) вазифадор гардидаанд, ки барои таъмини ҳаракати нақлиёт дар кӯчаҳои ҳамшафат бо назардошти гузоштани аломатҳои роҳ ва таъмини ҳаракати шаҳрвандон чораҳои зарурӣ андешанд.  Ҳамзамон тибқи ин қарор аз роҳбарони корхона, идора, муассиса, ташкилот ва субъектҳои хоҷагидорие, ки дар ҳудуди пойтахт фаъолият менамоянд, хоҳиш карда шудааст, ки барои ҳалли мушкилоти хатҳои муҳандисии иншооти мазкур ба фармоишгар — Муассисаи давлатии «Раёсати сохтмон, азнавсозӣ ва таъмири асосию ҷории роҳҳою кӯпрукҳои ҳудуди марзию маъмурии шаҳри Душанбе»-и пойтахт ҳамаҷониба мусоидат намоянд. Дар робита ба ин Зиёратшо Хушов, муовини сардори шӯъбаи бозрасии давлатии автомобилии Раёсати корҳои дохилии шаҳри Душанбе мегӯяд: зимни таъмиру навсозӣ ронандагони воситаҳои нақлиётӣ метавонанд тавассути кӯчаҳои Бохтар, Бухоро, Шота Руставелӣ, Шероз, Шоҳтемур, Мирзо Турсунзода ва Рӯдакӣ ҳаракат намоянд. Мавриди зикр аст, ки бар асари сардии зиёд ва зимистони тӯлонӣ соли равон баъзе аз қитъаҳои роҳҳои мошингарди кишвар, хусусан пойтахт хароб гардида ва ниёз ба таъмиру таҷдид доранд.