Ҳафтаи китоби кӯдакону наврасони Тоҷикистон
Душанбе, 3 апрел. (АМИТ «Ховар», Раъно Нусратуллоева).- 2 апрели соли 2012 дар толори Иттифоқи нависандагони Тоҷикистон маросими ифтитоҳи фестивали ҷумҳуриявии «Ҳафтаи китоби кӯдакону наврасони Тоҷикистон» барпо гардид. Фестивал ҳамасола тибқи нақшаи чорабиниҳои «Барномаи рушди фарҳанги Ҷумҳурии Тоҷикистон барои соли 2008-2015» баргузор мегардад. Дар он ҷонишини вазири фарҳанги Ҷумҳурии Тоҷикистон Фароғат Азизӣ ва адибони тоҷик суханронӣ намуданд. Сипас композитсияи адабию мусиқӣ бахшида ба 100 солагии шоири тоҷик Мирсаид Миршакар таҳти унвони «Ҳимматбаланде аз ошёни баланд» пешкаши ҳозирин гардид. Фестивал то рӯзи 9 апрел дар шаҳру ноҳияҳои ҷумҳурӣ идома меёбад. Дар ин бора аз Вазорати фарҳанг хабар доданд.