Ҳашари умумивилоятии ҷавонони суғдӣ

Душанбе, 11 апрел. (АМИТ «Ховар», Покиза Маҳмадбекова). — 28 апрели соли равон ҳашари умумивилоятии ҷавонон бахшида ба чорабиниҳои Рӯзи ҷавонони Тоҷикистон дар қаламрави вилояти Суғд баргузор хоҳад шуд. Моҳи майи соли 2012 дар қаламрави вилоят «Як моҳи ҷавонӣ» ва таҷлили Рӯзи ҷавонони Тоҷикистон дар вилояти Суғд таҳти шиори «Ватандорони беҳамтои мулкем!» таҷлил карда мешавад. Ба иттилои Хадамоти матбуоти раиси вилояти Суғд, раёсатҳои ҷавонон, варзиш ва сайёҳӣ, маорифи вилоят якҷоя бо шӯъбаи рушди иҷтимоӣ ва робита бо ҷомеаи дастгоҳи раиси вилоят, шӯъбаи кор бо занони мақомот, дар бораи мазмун ва мундариҷаи чорабиниҳои «Як моҳи ҷавонӣ» ва таҷлили Рӯзи ҷавонони Тоҷикистон дар вилоят вазифадор гаштаанд, ки тадбирҳои зарурӣ андешанд. Бояд гуфт, ки тибқи нақшаи чорабиниҳои идона дар қаламрави вилоят гузаронидани рӯзи «Сайри ҷавонӣ», иштирок дар ҳафтаи «Поси хотир» ба муносибати Рӯзи Ғалаба, муаррифии китоби тозанашри «Ҷавонинома» бо иштироки олимону муҳаққиқон ва адибони ҷавони вилоят, баргузории ярмаркаи вилоятии ҷойҳои кории холӣ барои ҷавонони ниёзманди шаҳру ноҳияҳои вилоят, гузаронидани намоиш-озмуни асарҳои рассомону наққошони ҷавони вилоят, намоиш-озмуни вилоятии ихтироъкорони ҷавону наврас байни донишҷӯёну хонандагони муассисаҳои таълимии шаҳру ноҳияҳои вилоят дар назар аст.