Ҷалби донишҷӯён ба корҳои идорӣ дар Суғд

Душанбе, 27 апрел. (АМИТ «Ховар», Бекназари Абӯбакр). — Аз 14 то 19 майи соли равон дар мақомоти иҷроияи ҳокимияти давлатии вилояти Суғд «Ҳафтаи иштироки донишҷӯёни муассисаҳои таҳсилоти олии касбии вилоят дар идораи мақомоти иҷроияи ҳокимияти давлатии вилояти Суғд» гузаронида мешавад. Дар ин хусус санаи 26 апрели соли равон қарори махсуси раиси вилоят Қоҳир Расулзода ба тасвиб расид.Аз хадамоти матбуоти раиси вилоят ба АМИТ «Ховар» иттилоъ доданд, ки ҳайъати гурӯҳи кории ташкил ва гузаронидани «Ҳафтаи иштироки донишҷӯёни муассисаҳои таҳсилоти олии касбии вилоят дар идораи мақомоти иҷроияи ҳокимияти давлатии вилояти Суғд» таҳти сарварии роҳбари дастгоҳи раиси вилоят Шарифҷон Шарифов тасдиқ гардида, ин тадбир баҳри баланд бардоштани самаранокии сиёсати давлат нисбат ба ҷавонон ва шиносонидани донишҷӯён бо низоми идораи давлат, ҷалби онҳо ба фаъолияти амалии мақомоти иҷроияи ҳокимияти давлатии вилоят роҳандозӣ карда мешавад.