Ҷалби пасандозҳо – самти асосии фаъолияти низоми бонкӣ

Душанбе, 4 апрел. (АМИТ «Ховар», Покиза Маҳмадбекова). — Дар фаъолияти низоми бонкӣ яке аз самтҳои асосӣ ҷалби пасандозҳои шахсони воқеӣ мебошад.  Роҳбари Хадамоти матбуоти дастгоҳи роҳбарияти Бонки миллии Тоҷикистон Абдуғаффор Қурбонов ба мухбири АМИТ «Ховар» иттилоъ дод, ки бақияи пасандозҳо дар охири моҳи феврали соли ҷорӣ нисбат ба ҳамин давраи соли гузашта 29,6 фоиз афзудааст. Аз ин маблағ ба пасандозҳо 1 609,4 млн. сомонӣ бо пули миллӣ (нисбат ба ҳамин давраи соли гузашта 16,3 фоиз) ва 2 811,5 млн. сомонӣ бо асъори хориҷӣ (нисбат ба ҳамин давраи соли пешин 38,7 фоиз) рост меоянд. Аз рӯи иттилои манбаъ, дар таркиби бақияи ҳаҷми пасандозҳо 44,3 фоиз ё маблағи 1 959,8 млн. сомониро пасандозҳои шахсони ҳуқуқӣ ва 55,7 фоиз ё 2 461,1 млн. сомониро пасандозҳои шахсони воқеӣ ташкил медиҳанд. Мувофиқи маълумоти оморӣ дар моҳҳои январ-феврали соли равон фоизи миёнавазни пасандозҳо бо пули миллӣ 16,79 фоиз ва пасандозҳо бо асъори хориҷӣ 14,63 фоизи солонаро ташкил намуд.