Ҷамъбасти даври дуввуми чемпионати мамлакат
Душанбе, 16 апрел. ( АМИТ «Ховар», Аловиддин Бӯриев).- Баъди дидорҳои даври дуввуми чемпионати мамлакат футболбозони дастаи «Регар- ТадАЗ» ба садри ҷадвали мусобиқот роҳ ёфтанд. Ғалабаи қотеъи ин даста бар «Парвоз» бо натиҷаи 4 бар 1 имкон дод, ки дастпарварони Муҳаммадҷон Ҳабибуллоев ҳамаро паси сар гузоранд. Ғайричашмдошт чемпиони ду соли охир «Истиқлол» натавонист «Хайр»-ро дар майдони худ мағлуб намояд. Бозии пуршиддат 1 бар 1- мусовӣ ҷамъбаст шуд. «Равшан» дар меҳмонӣ аз «Истаравшан» бо ҳисоби 1 бар 3, «Гвардия» аз «Хуҷанд» бо натиҷаи 1 бар 4 шикаст хӯрданд. Танҳо ба ССКА «Помир» муяссар шуд, ки дар сафар бар «Ҳосилот» бо натиҷаи 3 бар 1 ғалаба кунад. Вохӯрии «Зарафшон» бо «Энергетик» 2 бар 2- мусовӣ ба поён расид. Даври сеюм рӯзи 19-уми апрел бо бозии «Равшан» ва «Истиқлол» оғоз мешавад. 21-уми апрел «Гвардия» бо «Зарафшон» ва «Энергетик» бо «Истаравшан», рӯзи 22-юми апрел «Хайр» бо «Ҳосилот», ССКА «Помир» бо «Вахш», «Парвоз» бо «Хуҷанд» ба дидори ҳам мераванд.