«Ҷавонони Тоҷикистон»-мактаби рӯзноманигорон

Душанбе, 5 апрел. (АМИТ «Ховар», Дилшодаи Хайруллоҳ).- Имрӯз аз чопи нахустин шумораи рӯзномаи «Ҷавонони Тоҷикистон» 82 сол сипарӣ шуд. Моҳи Марти соли 1930 КМ ЛКСМ Тоҷикистон фаъолияти торафт зиёдшавандаи комсомоли ҷумҳуриро ба назар гирифта, бо мақсади боз ҳам пурзӯр намудани кори он, мустаҳкам намудани сафҳои комсомол, муттаҳид намудани коргарон, деҳқонон, ҷавонони камбағал ва миёнаҳол, ба роҳ мондани кори тарбиявӣ байни ҷавонон барои нашри рӯзномаи ҷавонон қарор қабул кард. Рӯзнома дар муддати фаъолият чанд маротиба тағйири ном кардааст: аз 5 апрели соли 1930 то 24 августи соли 1941 бо номи «Комсомоли Тоҷикистон», аз 1 сентябри соли 1945 то 12 июли соли 1956 бо номи «Ҷавонони Тоҷикистон», аз 15 июли соли 1956 то 27 декабри соли 1988 бо номи «Комсомоли Тоҷикистон», аз 1 январи соли 1989 то имрӯз бо номи «Ҷавонони Тоҷикистон» нашр мешавад. Ду маротиба ба мӯҳлати тӯлонӣ аз чоп бозмондааст: аз 24 августи соли 1941 то 01 сентябри соли 1945 ва аз 7 июли соли 1995 то 23 октябри соли 1998. 31 январи соли 1980 рӯзнома аз ҷониби Президиуми Совети Олии СССР бо ордени «Нишони фахрӣ» мукофотонида шуд. Собиқ рӯзноманигорони ҷавони «Ҷавонони Тоҷикистон» имрӯз ҳама журналистони варзида ва соҳибмактабанд.