42 ярмаркаи ҷойҳои кории холӣ дар чор моҳ
Душанбе, 30 апрел. (АМИТ «Ховар», Покиза Маҳмадбекова). — Дар чор моҳи соли равон дар миқёси вилояти Суғд 42 маротиба ярмаркаи ҷойҳои кории холӣ гузаронида шуд, ки зиёда аз 667 нафар корҷӯй аз тариқи ин ярмаркаҳо бо ҷойи кори доимӣ таъмин гардида ва 357 нафар шаҳрванд ба касбомӯзӣ фаро гирифта шуданд. Ба мухбири АМИТ «Ховар» аз Хадамоти матбуоти раиси вилояти Суғд иттилоъ доданд, ки дар ин давра ба мақомоти раёсату шӯъбаҳои Агентӣ дар вилояти Суғд 12 ҳазору 567 нафар шаҳрванд муроҷиат намуданд, ки аз онҳо 6 ҳазору 329 нафар ҳамчун корҷӯй ба қайд гирифта шуд. Дар ин муддат мувофиқи «Барномаи мусоидат ба шуғли аҳолӣ барои солҳои 2012-2013» бо ҷойи корӣ таъмин намудани 8 ҳазору 477 нафар шаҳрванди корҷӯй ва бекор ба нақша гирифта шуда буд, ки 3419 нафар аз тариқи роҳхатҳои раёсату шӯъбаҳои Агентии шаҳру ноҳияҳо барои бо ҷойи кори доимӣ таъмин шудан мусоидат карда шуд. Ин 40,3 фоизи нишондиҳандаи барномаи солонаро ташкил медиҳад. Дар чор моҳи соли равон аз ҳисоби шаҳрвандони бекори дар қайдбуда ба 1387 нафар муроҷиаткунанда барои касбомӯзӣ аз рӯи 20 номгӯи ихтисоси мувофиқ ба талаботи бозори меҳнат роҳхат дода шуд ва онҳо ройгон ба таҳсил фаро гирифта шуданд. Аз ҳисоби гурӯҳҳои худмаблағгузорӣ дар давраи ҳисоботӣ 1726 нафар ба касбомӯзӣ ҷалб карда шуд. Барои таъсиси ҳарчӣ бештари ҷойи кори иловагӣ ва рушди соҳибкории хурд, соли ҷорӣ тавассути раёсату шӯъбаҳои Агентӣ дар шаҳру ноҳияҳо ба 220 нафар шаҳрванди бекоре, ки хоҳиши фаъолияти соҳибкорӣ карданро доранд, қарзҳои имтиёзнок дода шуд.