Афзоиши маҳсулоти саноатӣ дар Суғд
Душанбе, 18 апрел. (АМИТ «Ховар»).-Моҳҳои январ-марти соли равон корхонаҳои саноатии вилояти Суғд ба маблағи 783478,3 ҳазор сомонӣ маҳсулот истеҳсол кардаанд, ки нисбат ба ҳамин давраи соли 2011 116,7 фоизро ташкил дод. Аз хадамоти матбуоти раиси вилояти Суғд ба АМИТ «Ховар» иттилоъ доданд, ки аз 272 корхонаи саноатӣ 174 ё 63,9 фоизи корхонаҳо ба сатҳи истеҳсоли маҳсулоти моҳҳои январ-марти соли 2011 расиданд, 47 корхона (17,3 фоиз) аз дараҷаи соли гузашта кам маҳсулот истеҳсол намудаанд. Аз миқдори умумӣ 51 корхона ё 18,8 фоизи корхонаҳо аз сабабҳои норасоии ашёи хом, набудани талабот ба маҳсулоти истеҳсолшаванда кор накарданд.Дар ин давра аз ҳаҷми умумии истеҳсолоти саноатӣ ҳиссаи маҳсулоти саноати коркард 70,7 фоиз, саноати истихроҷи маъдан 23,3 фоиз, истеҳсол ва тақсими қувваи барқ, газ ва об 6,0 фоизро ташкил дод.Аз 76 намуди муҳимтарин маҳсулоти саноатӣ истеҳсоли 46 номгўй (60,5 фоиз) афзуда, истеҳсоли 23 номгўй (30,3 фоиз) паст фаромад ва 7 номгўй (9,2 фоиз) умуман истеҳсол нашудааст.