Афзоиши субъектҳои соҳибкорӣ
Душанбе, 20 апрел. (АМИТ «Ховар», Бекназари Абӯбакр). — Дар Кумитаи давлатии сармоягузорӣ ва идораи амволи давлатии Ҷумҳурии Тоҷикистон маҷлиси васеи ҳайати мушовара доир ба ҷамъбасти фаъолияти семоҳаи аввали соли 2012 доир гардид. Он бо ҳисоботи роҳбарияти кумита оғоз гардида, ба ҳозирин оид ба дастовардҳо ва мушкилотҳои рушди соҳаҳои марбут ба самтҳои сармоягузорӣ, дастгирии соҳибкорӣ ва истифодаи самараноки моликияти давлатӣ маълумот пешниҳод карда шуд. Зикр гардид, ки то ҳолати 1 апрели соли 2012 маҷмӯи лоиҳаҳои татбиқшавандаи Ҳукумати кишвар 60 адад ва маблағи умумии онҳо 9 млрд. 200 млн. сомониро ташкил дод. Аз ҷумла, 21 лоиҳаи қарзӣ, 24 лоиҳаи грантӣ ва 15 лоиҳа дар ҳаммаблағгузории қарзию грантӣ мавриди татбиқ қарор доранд. Дар давраи ҳисоботӣ татбиқи 1 лоиҳаи давлатии сармоягузории нав оғоз гардид. Аз ҳисоби хусусигардонӣ ва истифодаи моликияти ҷумҳуриявӣ 6,7 млн. сомонӣ ба буҷаи давлат ворид шудааст. Маблағи мазкур 26,9 фоизи иҷрои нақшаи пешбинигардидаи Буҷаи давлатии Ҷумҳурии Тоҷикистон барои соли 2012-ро ташкил медиҳад.Тибқи маълумоти Кумитаи андози назди Ҳукумати Ҷумҳурии Тоҷикистон дар семоҳаи аввали соли 2012 дар миқёси ҷумҳурӣ 10 ҳазору 197 субъекти соҳибкории нав ба қайд гирифта шуд. Аз ин лиҳоз дар айни замон дар қаламрави ҷумҳурӣ 225 ҳазору 275 адад субекти соҳибкорӣ фаъолият намуда, ин нишондиҳанда зиёдшавии шумораи умумиро дар ҳаҷми 4,74 фоиз нишон медиҳад.