Арзёбии коршиноси байналмилалӣ

Душанбе, 23 апрел. (АМИТ «Ховар», Лутфия Эшонқулова). – Коршиноси байналмилалӣ ҷаноби Фил Ҷонсон ба манзури арзёбии самарабахшии татбиқи лоиҳаи Раёсати СММ оид ба маводи нашъаовар ва ҷинояткорӣ (TD|RER|F23) — «Системаҳои ҳифзи ҳуқуқ барои ҷамъоварӣ, таҳлил ва мубодилаи иттилооти фаврӣ дар бахши мубориза бо маводи нашъаовар» ва тарҳрезии стратегия барои солҳои наздиктарин аз Агентии назорати маводи нашъаовари назди Президенти ҶТ боздид намуд.Тавре аз маркази матбуоти Агентии назорати маводи нашъаовар ба АМИТ «Ховар» хабар доданд, дар ҷараёни мулоқот бо муовини директори Агентии назорати маводи нашъаовар Бунафша Одинаева ва кормандони шӯъбаи иттилооту таҳлили агентӣ ба Фил Ҷонсон аз натиҷаҳои фаъолият, эҳтиёҷон ва дурнамои рушди шӯъба хабар дода шуд.Шӯъбаи иттилооту таҳлили Агентии назорати маводи нашъаовари назди Президенти ҶТ муборизаи зидди гардиши ғайриқонунии маводи нашъаоварро таҳлил намуда, перомуни вазъи маводи нашъаовар дар ҷумҳурӣ ва минтақа ҳуҷҷатҳои хулосавию иттилоотӣ таҳия месозад.Лоиҳаи мазкур ғайр аз Тоҷикистон дар Озарбойҷон, Афғонистон, Қазоқистон, Қирғизистон, Туркманистон ва Ӯзбекистон низ амалӣ мегардад. Алҳол мутахассисони Раёсати СММ оид ба маводи нашъаовар ва ҷинояткорӣ санадҳоро барои тамдид намудани лоиҳаи (TD|RER|F23) таҳия менамоянд, ки он на фақат мақомоти салоҳиятдори кишварҳои зикршуда, балки бархе давлатҳои навро низ фаро мегирад.