Ба қонун дар бораи судҳо тағйирот ворид мегардад

Душанбе, 23 апрел.(АМИТ «Ховар», Марзия Саидова).- Лоиҳаи қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни конститусионии Ҷумҳурии Тоҷикистон «Дар бораи судҳои Ҷумҳурии Тоҷикистон» дар ҷаласаи Шӯрои палатаи поёнии парлумони мамлакат 23 апрел таҳти раёсати Шукурҷон Зуҳуров, раиси Маҷлиси намояндагон баррасӣ шуд. Муҳаммадато Султонов, котиби матбуотии палатаи поёнии парлумони мамлакат иттилоъ дод, ки аъзои Шӯро ҳамзамон масъалаҳои вобаста ба ворид намудани илова ба Қонуни Ҷумҳурии Тоҷикистон «Дар бораи Буҷети давлатии Ҷумҳурии Тоҷикистон барои соли 2012», «Дар бораи ворид намудани тағйиру иловаҳо ба Кодекси мурофиавии иқтисодии Ҷумҳурии Тоҷикистон», Кодекси гумрук ва Кодекси ҳуқуқвайронкунии маъмурии Ҷумҳурии Тоҷикистон ва Созишномаи грантӣ (Амалиёти махсус) байни Ҷумҳурии Тоҷикистон ва Бонки рушди Осиё доир ба «Лоиҳаи беҳтар намудани роҳи минтақавии автомобилгарди Душанбе – сарҳади Ӯзбекистон»-ро баррасӣ карданд. Инчунин дар Шӯро масъалаи баррасии ошкорои парлумонии «Иҷрои Буҷаи давлатии Ҷумҳурии Тоҷикистон дар соли 2011 ва се моҳи аввали соли 2012 ва амалӣ гардидани Қарори Ҳукумати Ҷумҳурии Тоҷикистон «Доир ба тадбирҳои беҳтар намудани вазъи мелиоративии заминҳои обёришавандаи кишоварзии Ҷумҳурии Тоҷикистон барои солҳои 2010 — 2014» муҳокима шуд.