Баланд бардоштани мавқеи Парлумон дар ҷараёни буҷетӣ

Душанбе, 24 апрел.(АМИТ “Ховар”, Марзия Саидова).- “Пешрафти татбиқи Стратегияи идораи давлатӣ ва Стратегияи идораи молияи давлатӣ”- таҳти чунин унвон имрӯз дар шаҳри Душанбе семинари омӯзишӣ баргузор гардид, ки дар кори он намояндагони мақомоти давлатӣ, парлумон ва дигар ниҳодҳои мамлакат иштирок доштанд. Вакилони палатаи поёнии парлумони мамлакат изҳор доштанд, ки Ҳукумати кишвар иқдоми ҷиддиро дар доираи маҷмӯи барномаҳои ислоҳотӣ барои таъмини рушди устувори иқтисодиёти мамлакат ва баланд бардоштани сатҳи зиндагии аҳолӣ дастури кори худ қарор додааст. Таъкид шуд, ки яке аз мақсадҳои муҳими рушди миллии Тоҷикистон ташкили системаи самараноки идораи давлатӣ ҳамчун асос дар рушди устувори иқтисодиёти мамлакат ва паст кардани сатҳи камбизоатист. Дар доираи барномаи ислоҳотӣ инчунин системаи идораи молияи давлатӣ мавқеи муҳимро ишғол мекунад, ки он баланд бардоштани самаранокӣ ва шаффофиятро талаб менамояд. Муваффақияти татбиқи ислоҳот дар ҷумҳурӣ, асосан ба такомули шохаи қонунгузории давлат вобаста аст.Мақсади чорабинӣ аз тақвияти иқтидори парламент ҷиҳати воқиф намудани вакилон аз ҷараёни татбиқи ислоҳоти давлатӣ иборат аст.