Бар асари сел 400 хонаи истиқоматӣ зарар дид

Душанбе, 30 апрел. (АМИТ «Ховар», Лутфия Эшонқулова). – Бар асари омадани сел 28 ва 29 апрел дар шаҳрҳои Душанбе, Кӯлоб ва ноҳияҳои Спитамен, Ваҳдат, Ёвон, Мӯъминобод, Восеъ ва Абдураҳмони Ҷомӣ бисёр ҳолатҳои фавқулодда ба қайд гирифта шуданд.Мувофиқи хабари маркази матбуоти Кумитаи ҳолатҳои фавқулодда ва мудофиаи шаҳрвандии назди Ҳукумати ҶТ, 82 хонаи истиқоматӣ, заминҳои наздиҳавлигӣ, як трансформатор, масофаи 60 метри сарбанди обанбори шаҳри Кӯлоб зарар диданд. Офати табиӣ дар ноҳияи Мӯъминобод қариб 200 хонаи истиқоматиро хароб намуд. Дар ноҳияи Восеъ 52 ва ноҳияи Абдураҳмони Ҷомӣ 43 хонаи истиқоматӣ осеб дидааст. Оилаҳои зарардида ба ҷойҳои бехатар кӯчонида ва ба онҳо ёрии таъҷилӣ расонида мешавад.Алҳол гурӯҳи махсуси Кумитаи ҳолатҳои фавқулодда ва мудофиаи шаҳрвандӣ оқибати ҳолатҳои фавқулоддаро бартараф менамояд.