Бозиҳои варзишии ҷавонони Тоҷикистон

Душанбе, 18 апрел. (АМИТ «Ховар», Дилшодаи Хайруллоҳ).- Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон бо мақсади рушди тарбияи ҷисмонӣ ва варзиш дар ҷумҳурӣ, тарғиби тарзи ҳаёти солим ва ҷалби бештари ҷавонон ба варзиш Бозиҳои варзишии ҷавонони Ҷумҳурии Тоҷикистонро аз рӯи 10 намуди варзиш: волейбол, баскетбол, гӯштини тарзи озод, дзюдо, самбо, гӯштини миллӣ, бокс, варзиши сабук, тенниси рӯи миз, таеквондо (ВТФ) дар се марҳила баргузор менамояд. Ғолибон ва ҷоизадорони Бозиҳои варзишӣ дар ҳисоби даставӣ аз рӯи ҷойҳои ишғол намуда ва медалҳои ба дастоварда муайян карда мешаванд. Ғолибон ва ҷоизадорони Бозиҳои варзишӣ аз рӯи намудҳо бо диплом, медал ва ҷамъбасти даставии намудҳои варзиш бо диплом ва ҷом, ғолибони даставии даври ҷамъбастии Бозиҳои варзишӣ бо диплом, ҷом ва тӯҳфаҳои хотиравии сарпарастон ва Кумитаи чавонон, варзиш ва сайёҳии назди Ҳукумати Ҷумҳурии Тоҷикистон қадрдонӣ мешаванд.Дар ин бора ба мухбири АМИТ «Ховар» аз бахши иттилоотию таҳлилии Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон иттилоъ доданд.